കോഴിക്കോട് ജില്ലയിലെ ദീർഘകാല ആവശ്യമായ ദേശീയപാത ബൈപാസ് നിർമാണം വീണ്ടും പ്രതിസന്ധിയിൽ. നഗരത്തിലെ ഗതാഗതക്കുരുക്കിന് ശാശ്വത പരിഹാരമായി വിഭാവനം ചെയ്ത പദ്ധതിയുടെ രാമനാട്ടുകര–വെങ്ങളം റീച്ച് മാത്രമാണ് നിലവിൽ പൂർത്തിയായത്. വെങ്ങളം–അഴിയൂർ റീച്ചിന്റെ നിർമാണം പാതിവഴിയിൽ നിലച്ചിരിക്കുകയാണ്. 2024 ഏപ്രിലിൽ പൂർത്തിയാകേണ്ടിയിരുന്ന ഈ പാതയുടെ നാല് ഭാഗങ്ങളും ഇതുവരെയും പൂർണ്ണരൂപത്തിലായിട്ടില്ല. തുടർന്ന് 2026 മാർച്ചിലേക്കും പിന്നീട് 2027 മാർച്ചിലേക്കും പദ്ധതിയുടെ കാലാവധി നീട്ടി നൽകിയിരിക്കുകയാണ്.
അദാനി റോഡ് ട്രാൻസ്പോർട്ടിനാണ് പദ്ധതിയുടെ നിർമാണ കരാർ ലഭിച്ചിരിക്കുന്നത്. വാഗാഡ് ഇൻഫ്രാ പ്രോജക്ട്സ് മുഖേനയാണ് നിലവിൽ നിർമാണം നടക്കുന്നത്. നിർമാണം വേഗത്തിലാക്കാൻ പുതുതായി രണ്ട് കമ്പനികളെക്കൂടി പദ്ധതിയിൽ ഉൾപ്പെടുത്താനുള്ള ശ്രമങ്ങൾ നടന്നുവരികയാണ്.
നിർമാണ പ്രവർത്തനങ്ങളുടെ നിലവിലെ അവസ്ഥ ഇങ്ങനെ:
* അഴിയൂർ–നാദാപുരം റോഡ് ഭാഗത്തെ സോയിൽ നെയിലിങ് തകർന്ന മുക്കാളി, മടപ്പള്ളി ഭാഗങ്ങളിൽ ആവശ്യമായ അറ്റകുറ്റപ്പണികൾ നടത്തിയിട്ടില്ല. മുക്കാളിയിൽ ഒരു വശത്ത് മതിൽ നിർമിച്ചെങ്കിലും മറുഭാഗം ഇടിഞ്ഞ അവസ്ഥയിലാണ്. കണ്ണൂക്കര, മടപ്പള്ളി, നാദാപുരം റോഡ്, ചോറോട് എന്നിവിടങ്ങളിലെ അടിപ്പാതകളുടെ നിർമാണം പുരോഗമിക്കുന്നു.
* നാദാപുരം റോഡ്–പാലോളിപ്പാലം ഭാഗത്തെ കൈനാട്ടി, പെരുവാട്ടുംതാഴ, അടക്കാതെരു എന്നിവിടങ്ങളിലെ വലിയ പാലങ്ങളിലേക്കുള്ള റോഡ് നിർമാണം പ്രാരംഭ ഘട്ടത്തിലാണ്. ചോറോട് റെയിൽവേ ലൈനിനു മുകളിൽ ബോസ്ട്രിങ് സ്റ്റീൽ പാലം സ്ഥാപിച്ചെങ്കിലും മറ്റ് അനുബന്ധ ജോലികൾ ബാക്കിയാണ്. വടകരയിലെ ലിങ്ക് റോഡ് മുതൽ പുതിയ സ്റ്റാൻഡ് വരെയുള്ള മേൽപാലം നിർമാണം പൂർത്തിയായെങ്കിലും അപ്രോച്ച് റോഡ് പണി തുടങ്ങിയിട്ടില്ല. പുതിയ സ്റ്റാൻഡ് മുതൽ കരിമ്പനപ്പാലം വരെയുള്ള ഫ്ലൈഓവർ നിർമാണം സംബന്ധിച്ച രൂപരേഖ പോലും ഇതുവരെ തയ്യാറായിട്ടില്ല.
* കുന്ന്യോറ മലയിൽ മണ്ണിടിച്ചിൽ ഭീഷണി നേരിടുന്നതിനാൽ 14 മീറ്റർ ഉയരത്തിൽ നിർമിക്കുമെന്ന് പ്രഖ്യാപിച്ച കോൺക്രീറ്റ് സംരക്ഷണ ഭിത്തിയുടെ പണി മന്ദഗതിയിലാണ്. പന്തലായനി കൂമൻതോടിനു കുറുകെയുള്ള അണ്ടർ പാസിന്റെ റോഡ് നിർമാണവും പാതിവഴിയിലാണ്.
* നന്തി കീഴൂർ റോഡ്, കൊല്ലം നെല്ലാടി റോഡ് ജംക്ഷൻ, നന്തിബസാർ, മൂരാട് അടിപ്പാത പരിസരം, ഇരിങ്ങൽ, പയ്യോളി ടൗൺ, പെരുമാൾപുരം എന്നിവിടങ്ങളിൽ സർവീസ് റോഡുകളുടെയും മേൽപാലങ്ങളുടെയും നിർമാണം ഇനിയും പൂർത്തിയാകാനുണ്ട്.
അതേസമയം, കുന്ന്യോറമലയിൽ ആകാശ നടപ്പാത നിർമിക്കുമെന്ന ഉറപ്പ് പാലിക്കാത്തതിൽ നാട്ടുകാർ പ്രതിഷേധത്തിലാണ്. എസ്എൻഡിപി കോളജ്, ഗുരുദേവ കോളജ് എന്നിവിടങ്ങളിലായി പഠിക്കുന്ന രണ്ടായിരത്തോളം വിദ്യാർഥികളും അധ്യാപകരും ജീവനക്കാരും അടക്കം നിരവധി പേർ ഈ പ്രദേശത്തെ ആശ്രയിക്കുന്നുണ്ട്. ബൈപാസ് പൂർത്തിയാകുന്നതോടെ ഗതാഗതം ദുസ്സഹമാകുമെന്ന ആശങ്കയിലാണ് നാട്ടുകാർ. എൻഎച്ച്എഐ അധികൃതർ നൽകിയ വാഗ്ദാനം ലംഘിക്കപ്പെട്ട സാഹചര്യത്തിൽ ശക്തമായ പ്രക്ഷോഭത്തിന് ഒരുങ്ങുകയാണ് പ്രദേശവാസികൾ.
Labels: Kerala, Kozhikode, Main