പശ്ചിമേഷ്യയിൽ സമാധാന ശ്രമങ്ങൾ പുരോഗമിക്കുന്നതിനിടെ ഇറാനിൽ യുഎസ് നടത്തിയ സൈനിക നീക്കം നിക്ഷേപകരിൽ ആശങ്ക പടർത്തുന്നു. സൈനികരുടെ സുരക്ഷ മുൻനിർത്തിയാണ് പ്രതിരോധ നടപടി സ്വീകരിച്ചതെന്ന് യുഎസ് അധികൃതർ വിശദീകരിക്കുന്നു. ഈ സംഭവവികാസങ്ങൾ മേഖലയിൽ സംഘർഷം വർധിപ്പിക്കുമോ എന്ന ആശങ്ക നിലനിൽക്കുന്നുണ്ടെങ്കിലും, ഇരുരാജ്യങ്ങളും ഒരു സമ്പൂർണ്ണ യുദ്ധത്തിലേക്ക് നീങ്ങാൻ സാധ്യതയില്ലെന്നാണ് വിലയിരുത്തൽ. ഈ വാർത്തകൾക്ക് പിന്നാലെ ആഗോളതലത്തിൽ ക്രൂഡ് ഓയിൽ വിലയിൽ വർധനവുണ്ടാവുകയും സ്വർണവിലയിൽ ഇടിവ് രേഖപ്പെടുത്തുകയും ചെയ്തു.
ഇറാൻ– യുഎസ് ബന്ധം: നിലപാടുകൾ
തങ്ങൾ യുഎസ് സമ്മർദ്ദത്തിന് വഴങ്ങില്ലെന്നും സ്വന്തം ജനതയുടെ താല്പര്യങ്ങൾക്കനുസരിച്ചേ മുന്നോട്ട് പോകുകയുള്ളൂവെന്നും ഇറാൻ വ്യക്തമാക്കി. ലെബനനിൽ ഇസ്രായേൽ നടത്തുന്ന വ്യോമാക്രമണങ്ങൾ സമാധാന ശ്രമങ്ങളെ അട്ടിമറിക്കുന്നുവെന്നും ഇറാൻ യുഎസിനെ അറിയിച്ചു. അതേസമയം, ഇറാനുമായുള്ള ചർച്ചകൾ അനുകൂലമാണെന്നും, മികച്ചൊരു കരാറിലേക്കാണ് തങ്ങൾ ഉറ്റുനോക്കുന്നതെന്നും യുഎസ് പ്രസിഡന്റ് ഡോണൾഡ് ട്രംപ് പ്രതികരിച്ചു.
ഓഹരി വിപണിയിലെ പ്രതികരണം
ഇന്നലെ ഇന്ത്യൻ ഓഹരി വിപണി മികച്ച മുന്നേറ്റം കാഴ്ചവെച്ചിരുന്നു. സെൻസെക്സ് 1073 പോയിന്റ് ഉയർന്ന് 76,488.96ലും നിഫ്റ്റി 312 പോയിന്റ് ഉയർന്ന് 24,031ലും വ്യാപാരം അവസാനിപ്പിച്ചു. ബാങ്കിംഗ്, ഫിനാൻഷ്യൽ, ഓട്ടോ, റിയൽറ്റി മേഖലകളിൽ വൻ നിക്ഷേപമാണ് ഉണ്ടായത്. എന്നാൽ, പുതിയ സംഭവവികാസങ്ങളുടെ പശ്ചാത്തലത്തിൽ ഇന്ന് വിപണി ജാഗ്രതയോടെയാണ് നീങ്ങുന്നത്. ഗിഫ്റ്റി നിഫ്റ്റി നേരിയ നേട്ടത്തിലാണ് വ്യാപാരം തുടരുന്നത്. ഏഷ്യൻ വിപണികളിൽ സമ്മിശ്ര പ്രതികരണമാണ് ദൃശ്യമാകുന്നത്. ദക്ഷിണ കൊറിയയിലെ കോസ്പി സൂചിക മൂന്നു ശതമാനത്തോളം ഉയർന്ന് റെക്കോർഡ് കുറിച്ചപ്പോൾ, ജപ്പാനിലെ നിക്കെയ് ഉൾപ്പെടെയുള്ള സൂചികകൾ നഷ്ടത്തിലായി.
ക്രൂഡ് ഓയിലും സ്വർണവും
സംഘർഷ വാർത്തകളെ തുടർന്ന് ബ്രെന്റ് ക്രൂഡോയിൽ വില 2.5 ശതമാനം ഉയർന്ന് ബാരലിന് 98.29 ഡോളറിലെത്തി. എന്നാൽ ഡബ്ല്യുടിഐ ക്രൂഡ് അഞ്ച് ശതമാനവും യുഎഇയുടെ മർബൻ ക്രൂഡ് പത്തുശതമാനവും ഇടിഞ്ഞു. സ്വർണവിലയിൽ ഔൺസിന് 4537 ഡോളർ എന്ന നിലയിലാണ് ഇപ്പോൾ വ്യാപാരം നടക്കുന്നത്.
രൂപയുടെ കരുത്ത്
തുടർച്ചയായ മൂന്നാം ദിവസവും രൂപയുടെ മൂല്യത്തിൽ വർധനയുണ്ടായി. ഡോളറിനെതിരെ രൂപയുടെ മൂല്യം 95.25 നിലവാരത്തിലെത്തി. രൂപയുടെ സ്ഥിരത ഉറപ്പാക്കാൻ ആവശ്യമായ നടപടികൾ സ്വീകരിക്കുമെന്ന് റിസർവ് ബാങ്ക് ഗവർണർ സഞ്ജയ് മൽഹോത്ര വ്യക്തമാക്കിയിരുന്നു.
(Disclaimer: ഈ ലേഖനം നിക്ഷേപങ്ങൾക്കായുള്ള നിർദേശമോ ഉപദേശമോ അല്ല. ഓഹരി, സ്വർണം തുടങ്ങിയ നിക്ഷേപങ്ങൾ വിപണിയിലെ റിസ്കുകൾക്ക് വിധേയമാണ്. നിക്ഷേപം നടത്തുന്നതിന് മുമ്പ് സ്വയം പഠനങ്ങൾ നടത്തുകയോ വിദഗ്ധ ഉപദേശം തേടുകയോ ചെയ്യുക.)
