സംസ്ഥാനത്ത് ഭാരവാഹനങ്ങൾക്ക് സമയനിയന്ത്രണം ഇന്ന് മുതൽ: കർശന പരിശോധനയുമായി മോട്ടർവാഹന വകുപ്പും പൊലീസും

സംസ്ഥാനത്തെ ഗതാഗതക്കുരുക്ക് ലഘൂകരിക്കുന്നതിന്റെ ഭാഗമായി ടിപ്പർ ലോറികൾ ഉൾപ്പെടെയുള്ള ഭാരവാഹനങ്ങൾക്ക് സർക്കാർ ഏർപ്പെടുത്തിയ സമയനിയന്ത്രണം ഇന്ന് മുതൽ പ്രാബല്യത്തിൽ വരും. സ്കൂൾ, ഓഫിസ് സമയങ്ങളിൽ തിരക്ക് കുറയ്ക്കുന്നതിനായി രാവിലെയും വൈകിട്ടുമാണ് നിയന്ത്രണം ഏർപ്പെടുത്തിയിരിക്കുന്നത്. നിരോധനം നിലനിൽക്കുന്ന സമയങ്ങളിൽ ഈ വാഹനങ്ങൾ റോഡിലിറക്കാതെ നിശ്ചിത കേന്ദ്രങ്ങളിൽ നിർത്തിയിടേണ്ടതാണ്. നിയമലംഘനങ്ങൾ തടയുന്നതിനായി മോട്ടർവാഹന വകുപ്പും കേരള പൊലീസും സംയുക്തമായി പരിശോധന നടത്തും.

വിവിധ ജില്ലകളിലെ നിയന്ത്രണ സമയക്രമം താഴെ പറയുന്നതാണ്:

തിരുവനന്തപുരം: രാവിലെ 8.00–10.00, വൈകിട്ട് 3.00–4.30

കൊല്ലം: രാവിലെ 8.30–10.00, വൈകിട്ട് 3.30–4.30

പത്തനംതിട്ട: രാവിലെ 8.30–10.00, വൈകിട്ട് 3.00–4.30

ആലപ്പുഴ: രാവിലെ 8.30–10.00, വൈകിട്ട് 3.30–5.00

കോട്ടയം: രാവിലെ 8.30–9.30, വൈകിട്ട് 3.30–4.30

ഇടുക്കി, എറണാകുളം: രാവിലെ 8.30–10.00, വൈകിട്ട് 4.00–5.00

തൃശൂർ, പാലക്കാട്, മലപ്പുറം, കോഴിക്കോട്, വയനാട്: രാവിലെ 8.30–10.00, വൈകിട്ട് 3.30–5.00

കണ്ണൂർ: രാവിലെ 8.00–10.00, വൈകിട്ട് 4.00–6.00

കാസർകോട്: രാവിലെ 9.00–10.00, വൈകിട്ട് 4.00–5.00