ഐപിഎല്ലിലെ തുടർച്ചയായ മോശം പ്രകടനങ്ങളുടെ പശ്ചാത്തലത്തിൽ മുംബൈ ഇന്ത്യൻസ് ടീമിൽ സമൂലമായ മാറ്റങ്ങൾക്ക് വഴിയൊരുങ്ങുന്നു. കഴിഞ്ഞ രണ്ട് സീസണുകളിലെ നിരാശാജനകമായ പ്രകടനം ടീം മാനേജ്മെന്റിനെ വലിയ തീരുമാനങ്ങളിലേക്ക് നയിച്ചിരിക്കുകയാണ്. 2024-ൽ പത്താം സ്ഥാനത്തും, 2026-ൽ ഒൻപതാം സ്ഥാനത്തുമാണ് ടീം ഫിനിഷ് ചെയ്തത്. ഇതിനു പിന്നാലെയാണ് ടീമിനെ ഉടച്ചുവാർക്കാനുള്ള നീക്കങ്ങൾ മാനേജ്മെന്റ് ശക്തമാക്കിയത്.
നിലവിലെ നായകൻ ഹാർദിക് പാണ്ഡ്യ ടീം വിട്ടേക്കുമെന്ന റിപ്പോർട്ടുകൾക്കിടെ, ഒരു മുതിർന്ന താരത്തെ കൂടി ടീമിൽ നിന്ന് ഒഴിവാക്കാൻ മാനേജ്മെന്റ് തീരുമാനിച്ചതായാണ് വിവരം. അടുത്ത സീസൺ മുതൽ ഈ താരത്തിന് ടീമിൽ മറ്റൊരു റോൾ നൽകാനാണ് ആലോചന. എന്നാൽ ഈ താരം ആരാണെന്ന് വ്യക്തമാക്കാൻ മാനേജ്മെന്റ് ഇതുവരെ തയ്യാറായിട്ടില്ല. ആരാധകർക്കിടയിൽ രോഹിത് ശർമ്മയുടെ പേരാണ് പ്രധാനമായും ചർച്ചയാകുന്നത്.
ടീമിനെ നയിക്കാൻ പുതിയ ക്യാപ്റ്റനെ കണ്ടെത്തുന്നതിനുള്ള ചർച്ചകളും സജീവമാണ്. ഇതിനായി പ്രധാനമായും മൂന്ന് താരങ്ങളെയാണ് പരിഗണിക്കുന്നത്. ഇതിൽ യുവതാരം തിലക് വർമ്മയ്ക്കാണ് മുൻതൂക്കം. സീസണിന്റെ പകുതിയിൽ നടന്ന വിലയിരുത്തൽ യോഗത്തിൽ ഒരു മുതിർന്ന താരം തന്നെയാണ് ക്യാപ്റ്റൻ സ്ഥാനത്തേക്ക് തിലകിന്റെ പേര് നിർദേശിച്ചത്. കഴിഞ്ഞ കുറച്ചു വർഷങ്ങളായി മുംബൈ ടീമിന്റെ വിശ്വസ്തനായ തിലക് വർമ്മയ്ക്ക് ടീമിനെ മികച്ച രീതിയിൽ നയിക്കാൻ സാധിക്കുമെന്നാണ് വിലയിരുത്തൽ.
തിലകിനൊപ്പം സൂര്യകുമാർ യാദവ്, ജസ്പ്രീത് ബുമ്ര എന്നിവരുടെ പേരുകളും പരിഗണനയിലുണ്ട്. ഹാർദിക് പാണ്ഡ്യയുടെ അഭാവത്തിൽ ഈ സീസണിൽ മൂന്ന് മത്സരങ്ങളിൽ മുംബൈയെ നയിച്ചത് ഇന്ത്യയുടെ ടി20 ക്യാപ്റ്റനായ സൂര്യകുമാർ യാദവായിരുന്നു. ഒരു മത്സരത്തിൽ ജസ്പ്രീത് ബുമ്രയും ടീമിനെ നയിച്ചു. എങ്കിലും, ഭാവി മുന്നിൽക്കണ്ട് തിലക് വർമ്മയെ ക്യാപ്റ്റനാക്കാനാണ് മാനേജ്മെന്റിന്റെ നീക്കം. ഒഴിവാക്കപ്പെടുന്ന മുതിർന്ന താരത്തിന് മെന്റർ പദവിയോ അല്ലെങ്കിൽ കോച്ചിങ് സ്റ്റാഫിലെ മറ്റൊരു ചുമതലയോ നൽകാനാണ് സാധ്യതയെന്നും റിപ്പോർട്ടുകൾ സൂചിപ്പിക്കുന്നു.